Í samstarfi við Skákakademíu Reykjavíkur verður nemendum í 3. - 6. bekk Rimaskóla boðið upp á skákkennslu í vetur. Nemendur í 5. og 6. bekk fá eina kennslustund á viku helming skólaársins. Yngri nemendur í 3. og 4. bekk fá styttri námskeið að jafnaði einu sinni í mánuði. Kennslan í 5. - 6. bekk er þegar hafin og er það Björn Þorfinnsson alþjóðlegur skákmeistari og einn af landsliðsmönnum Íslands í skák sem leiðir kennslutímana. Markmið kennslunnar er að kynna nemendum með áhugaverðum hætti skáklistina og að þeir læri undirstöðuatriðin. Um 20 grunnskólar í Reykjavík eru í samstarfi við Skákakademíuna á þessu skólaári. (HÁ)

Við lok 17. árs skólastarfs í Rimaskóla heiðraði Helgi skólastjóri tvo kennara sem voru að ljúka sínu 10. starfsári. Þetta eru þær Guðbjörg Íris Atladóttir umsjónarkennari og Siv Heiða Franksdóttir kennari í textílmennt. Skólastjóri fór í stuttu máli yfir feril þeirra í Rimaskóla sem hefur verið afar farsæll og gefandi. Báðar eru þær Íris og Siv Heiða þrautskipulagðar og með góða stjórn á nemendum sínum. (HÁ)