Þeir bræður Máni Karl og Garbríel Andri Guðmundssynir sem báðir eru í Rimaskóla stóðu sig frábærlega þegar þeir kepptu á Fylkir open karatemóti þann 11. nmái sl. Þeirt unnu báðir til gullverðlauna í sínum aldursflokkum. Máni Karl sem er 14 ára gamall hefur lokið öllum þrek og beltaprófum og er kominn í 1 kyu. Gabríel Andri sem er í 3. bekk var að klára gráðu fyrir 4 kyu ho. Glæsilegur árangur hjá þessum bræðrum og ekki spurning að þeir eiga framtíðina fyrir sér í þessari vinsælu íþrótt. (HÁ)

Frábær árshátíð unglingadeildar Rimaskóla var haldin í skólanum 10. maí. Nemendur fjölmenntu í sínum fínustu spjörum og settust að veisluborði þar sem boðið var upp á „gourmet" mat frá Grillvagninum. Flottir foreldrar þjónuðu til borðs. Úrslit voru kunngerð í könnun nemenda á hver væri t.d. bjartasta vonin, fallegasta brosið, herra og ungfrú Rimaskóli og kennari ársins, en sá heiður féll í skaut Magnúsar Matthíaassonar að þessu sinni. Mikið var beðið eftir frumsýningu kennaragrínsins og olli það sko ekki vonbrigðum, „frábært kennaragrín" var samdóma álit kennaranna sem skemmtu sér ekki síður vel á árshátíðinni en nemendur og öllum bar saman um að hátíðin væri nemendum og skólanum til mikils sóma. Hátíðinni lauk með dúndrandi diskóteki og allir út á gólfið. (HÁ)

Nemendur 1-JR komu vel undirbúin og fluttu skemmtilega dagskrá á föstudagsfjöri. Þau hafa verið að læra um íslensku húsdýrin og sungu, dönsuðu og fluttu fróðleik um hundinn og köttinn. Hundadansinn er greinilega mjög skemmtilegur og krakkarnir hafa greinilega gaman af því að dansa. Þau tóku líka Byggingadansinn og línudans. Hulda danskennari hefur greinilega kennt þeim ótrúlega mikið í vetur. Rakel tónmenntakennari spilaði undir skólasöng Rimaskóla og þá tóku allir nemendur skólans sem voru í salnum vel undir. Rimaskóli er ríkur að eiga svona fallegan skólasöng. Margir góðir brandarar voru fluttir á dagskránni og eins léku tvær stúlkur mjög fallega á flautur. Öllu þessu stjórnaði Jóhanna kennari eins og herforingi og dagskráin öll gekk mjög vel fyrir sig. Mikill fjöldi foreldra og annarra gesta mættu á föstudagsfjörið og gáfu sér góðan tíma á eftir að spjalla og gleðjast yfir velheppnaðri frammistöðu. (HÁ)

Nemendur í 2-SB voru svo sannarlega í sumarskapi þegar þau skemmtu á föstudagsfjöri 4. maí. Þetta er mikill dansbekkur eins og vel mátti greina bæði í hópatriðum og dansatriðum einstakra nemenda. Börnin syngja líka mjög vel og tóku tvö vorlög undir stjórn Rakelar Maríu tónmenntakennara. Í bekknum leynist söngstjarna, hún Sara ísfeld sem sýndi mikil tilþrif þegar hún söng um Eyrúnu eyðslukló. Áhorfendur kunnu svo vel að meta nokkra stutta brandara og hlógu dátt. Stoltir foreldrar, systkini og ættingjar fjölmenntu og þáðu kaffi og meðlæti að loknu velheppnuðu fjöri. (HÁ)