Skip to content

Skáksveit Rimaskóla boðið til Færeyja

Sex nemendur í 6. og 7. bekk Rimaskóla duttu í lukkupottinn þegar þeim var boðið í frábært skákferðalag til Færeyja með styrk frá Vestnorræna höfuðborgarsjóðnum. Heimsóknin var ætluð til að koma á skáksamstarfi Rimaskóla við færeyska skákkrakka á skólaaldri. Það var ekki að sökum að spyrja að hópurinn hlaut höfðinglegar mótttökur hjá frændum vorum Færeyingum sem skipulögðu fjölbreytta dagskrá í þrjá daga, 20. – 23. sept. ásamt frábæru húsnæði og aðstöðu. Fararstjórar krakkanna voru þeir Helgi Árnason fv. skólastjóri Rimaskóla og Björn Ívar Karlsson skákkennari skólans. Færeyjar skörtuðu sínu fegursta og krakkarnir ferðuðust um á bílaleigubílum á mili Þórshafnar og Klaksvíkur með viðkomu í ótal byggðalögum á leiðinni. Krakkarnir tóku þátt í tveimur skákmótum, annars vegar einstaklingsmóti og hins vegar nokkurs konar landskeppni á milli færeyskra skákkrakka og Rimaskólasveitar. Sara Sólveig Lis í 7. bekk Rimaskóla sigraði á einstaklingsmótinu og lið Rimaskóla bar sigur í landskeppninni 20 – 14. Bæði mótin voru jöfn og spennandi allt til síðustu skákar. Tíminn í Færeyjum nýttist vel til skákæfinga sem Björn Ívar hélt utan um. Heimsókn Rimaskóla vakti áhuga stjórnarmanna í Skáksambandi Færeyja. Stjórnin boðaði til fundar í tilefni íslensku heimsóknarinnar þar sem Björn Ívar flutti afar áhugavert erindi um skákstarfið í Rimaskóla allt frá byrjun árið 1993 sem stjórnarmönnunum færeysku var vel kunnugt um. Eins og áður sagði fékk íslenski hópurinn afar góðar móttökur í Færeyjum. Það var mikið teflt og margt spennandi að sjá og upplifa hjá krökkunum í þeirra fyrstu heimsókn til Færeyja. Rimaskólakrakkarnir eru á aldrinum 11 – 12 ára gömul og skipa skáksveit skólans á barnaskólastigi. Þetta eru þau Sara Sólveig í 7. bekk og 6. bekkingarnir Sóley Kría, Aðalbjörn Þór, Aron Örn, Arnar Gauti og Daníel Tal.